NOVEMBER 21, 2018 (DHAHAR) – Musharraxa xilka Madaxwaynaha Puntland ee sannadka 2019, Injineer Maxamuud Khaliif Xasan Jebiye ayaa lacag ugu deeqay Isbitaalka Degmada Dhahar iyo Machadka Barashada Diinta ee Dhahar.
Musharraxa wuxuu $15,000 (shan iyo toban kun oo doollar) ugu deeqay Machadka Barashada Diinta ee Dhahar. Dhismaha Machadka oo xilligan qabyo ah, waxaa lagu bilaabay dhaqaale ay iska soo uruuriyeen qaybaha kala duwan ee bulshada degmada Dhahar.
Sidoo kale, Musharraxu wuxuu ballan qaaday in uu bixinayo kharashka ku baxaya qalabaynta saalada qalliinka dhalmada ee Isbitaalka Dhahar, qalabkaas oo maamulka isbitaalku sheegeen in qiimihiisu yahay $17,000 (todoba iyo toban kun oo doollar).
Bulshada degmada Dhahar ayaa uga mahadceliyey Injineer Maxamuud Khaliif Xasan Jebiye kaalinta uu ka qaatay horumarinta degmada Dhahar, iyagoo ballan qaaday in ay sii joogtayn doonaan taageerada ay u hayaan Ololaha Karti iyo Hufnaan.
Leave a Reply