DECEMBER 23, 2018 – Musharrax Maxamuud Khaliif Xasan Injineer Jebiye ayaa hoyga uu magaalada Garoowe ka deggen yahay ku booqday Baashe Cabdullaahi Maxamuud Aw-Cismaan.
Baashiga ayaa ugu duceeyey Musharrax Jebiye in Eebbe u hirgeliyo hammigiisa siyaasadeed kuna guuleeyo ololaha uu ugu jiro sidii uu ku hanan lahaa xilka Madaxwaynaha Puntland.
Dhinaca kale, Musharrax Maxamuud Khaliif Xasan Jebiye ayaa isla maanta bulshada kula shaaheeyey waqtina kula soo qaatay maqaaayadda Kallis ee magaalada Garoowe.
Qaar kamid ah dadwaynihii goobtaas ku sugnaa ayaa musharraxa bariidiyey si furanna ula sheekaystay, iyagoo xusay inay aad ugu riyaaqeen booqashada kediska ah ee musharraxu goobtaas ku tegay iyo weliba sida uu mar kasta u yahay siyaasi jecel in uu bulshadisa ku dhex jiro.
Abwaan Cabdiqaadir Cabdi Shube oo kamid ahaa mas’uuliyiintii goobtaas sida kediska ah Musharrax Jebiye ugula kulmay, wuxuu sheegay in musharraxa maanta laga bilaabo uu ugu wanqalay magac cusub kaasoo ah ‘Jimciye’, isagoo Ilaah uga baryey in uu ka dhigo kii bulshada Puntland culayska saaran ka jimciya [fududeeya].
Leave a Reply