November 22, 2018 (QARDHO) – Musharraxa xilka Madaxwaynaha Puntland Injineer Maxamuud Khaliif Xasan Jebiye iyo wafdi ballaaran oo uu horkacayo ayaa si mug leh loogu soo dhoweeyey degmada Qardho ee xarunta gobolka Karkaar.
Kumannaan dadwayne ah oo soo dhoweyntiisa usoo baxay ayuu Musharrax Jebiye kula hadlay fagaaraha Barxadda Qardho, wuxuuna ugu mahadceliyey sida qiimaha badan ee isaga iyo wafdigiisa loo soo dhoweeyey.
Injineer Maxamuud Khaliif wuxuu ballan qaaday haddii loo doorto xilka Madaxwaynaha Puntland in uu wax ka qaban doono baahiyaha ay degmadu qabto, gaar ahaan tayeynta adeegyada waxbarashada, caafimaadka iyo biyaha.
Dhinaca kale, Musharraxu wuxuu wax laga xumaado ku tilmaamay in musharraxiinta qaar loo diido inay dibadbaxyo ku qabsadaan Barxadda Qardho, isagoo xusay in goobtani tahay goob dadwayne ujeedada loo dhisayna tahay in shacabku isu soo baxyadooda si nabad ah ugu qabsadaan.
Musharrax Maxamuud Khaliif Xasan Injineer Jebiye ayaa weli ku guda jira socdaalka uu ugu magac daray ‘Tashi iyo Tabasho’. Socdaalkan ayaa ah mid Musharraxu ugu kuur gelayo xaaladda guud ee dalka, islamarkaana uu kula tashanayo qaybaha kala duwan ee bulshada.
Leave a Reply